2 Samuël 17
01Achitofel zee tegen Absalom: "Loat mie twaalfdoezend man oetkaizen en doalek achter David aangoan, vannaacht nog.
02Den overvaal ik hom as hai nog muid en ongedoan is. Ik joag hom schrik op hoed, en van aalteroatsie gaait aal zien volk der vandeur. Den blift e allain over en kin ik mit hom ofreken.
03Ik zel zörgen dat aal t volk dat bie David is weer bie joe komt. En as ie dij aine, doar ie nou achter heer zitten, te pakken kriegen, wil dat zoveul zeggen as dat ie ale Isrelieten weer op joen haand kriegen en dat ter rust en vree komt."
04Dat leek Absalom en ale oldsten van Israël goud tou.
05Toch zee Absalom: "Hoal ook nog ais Chusai d'Arkiet op, den kin wie heuren wat of dij der van zegt."
06Dou Chusai kwam, zee Absalom: "Zo en zo is t veurstel van Achitofel. Mout wie doun wat of hai zegt? As ie der aans over denken, kom der den mor mit veurndag."
07"Dizze raais het Achitofel t bie verkeerde èn," zee Chusai.
08"Ie waiten ja beter as wèl ook, dat joen voader en zien manlu veur gainain benaauwd binnen en grammiedeg as n beer dij ze zien jongen ofstolen hebben. Leuf mor nait dat zo'n ervoaren vechtersboas as hai vannaacht mit zien manlu ligt te sloapen.
09Dou der denk om, hai holdt zok vervaast al schoel in n grot of aans woaraarns. As hai eerste is dij aanvaalt, den zel elkenain dij t heurt, zeggen: 'Absalom en zien volk hebben n dik pak sloag had!'
10 Alderdeegs n veurvechter mit t haart van n laiw zel den nog benaauwd worden. Hail Israël wait ja wel dat joen voader n held is as gain aander, en dat zien soldoaten dappere kerels binnen.
11 Nee, ik geef joe te roade: hoal t haile Israël bie nkander, van Dan òf tot aan Berseba tou, zo talriek as zaand bie zee. En den mout ie zulm mit heur mitgoan.
12 Woar dat hai ook touholdt, wie overvalen hom as daauw dij over t laand vaalt. Haizulm nait en ook gainain van zien manschoppen blift den nog in t levent.
13 En as hai zok terogtrekt in n stad, den loat wie hail Israël dikke koabels doarhèn mitnemen en slepen haile stad in leegte bie t wotter, aan leste stain tou."
14 "Chusai zien plan is beter as dij van Achitofel," zee Absalom, en aal Isrelieten zeden hom t noa. De HEER haar heur ja aanzet om t goie plan van Achitofel van toavel te vegen, omreden hai haar t op Absalom veurzain.
15 Chusai zee tegen priesters Sadok en Abjatar: "Zo en zo het Achitofel Absalom en Israëls oldsten roaden. Mor ik zó.
16 Stuur doarom zo gaauw as t aaids kin David dizze bosschop: 'Blief vannaacht nait bie oversteekploatsen noar woestijn tou, mor goa votdoalek over Jordaan, aans zel t mit joe en joen volk nait goud oflopen."
17 Jonatan en Achimaäs stonden al kloar bie Rogelwèl. Zai konden heur vanzulm nait in stad zain loaten, en n sloavin brochde heur tieden dij ze aan David overbrengen mozzen.
18 Mor toch was ter n jongkerel dij heur zain haar en t aan Absalom vertelde. Baaide jonges gingen votdoalek op pad noar Bachurim. Doar gingen ze noar t hoes van n man dij op zien haim n put haar, en doar kropen ze in.
19 Zien vraauw gooide n klaid over put hèn en streude doar koorn op, zodat t nait in de goaten laip.
20 Dou Absalom zien knechten bie vraauw in hoes kwammen, vruigen ze: "Woar binnen Achimaäs en Jonatan?" "Doargunders over t wotter goan," zee ze. Absalom zien soldoaten gingen op zuik, mor konden heur nait vinden en gingen dou onverrichter zoake weerom noar Jeruzalem.
21 Dou zai vot wazzen, kropen jonges tou put oet en brochten bosschop aan David over: "Ie mouten zo gaauw as ie kinnen, moaken dat ie aan aanderkaant Jordaan kommen, want dit en dat het Achitofel tegen joe in t zin."
22 Vot begunde David revier over te steken mit zien haile aanhang. Dou t licht wer, wazzen ze altmoal aan aander kaant, gainain oetzunderd.
23 Wat Achitofel aangaait: dou hai zag dat zien road op niks oetdraaid was, zoadelde hai zien ezel, ging noar zien hoes in Gilo, regelde zien zoaken en hong zok op. Hai wer begroaven in t graf van zien voader.
24 David was al in Machanaïm dou Absalom nog dounde was om mit t haile leger van Israël Jordaan over te steken.
25 Absalom haar in tied Amasa as generoal benuimd in stee van Joäb. Dij Amasa was n zeun van n Ismaëliet dij Jitra haitte. Dij haar hom kregen bie Abigal, n dochter van Nachas en zuster van Joäb zien moeke Seruja.
26 Absalom en zien leger zetten heur tènten op in t laand Gilead.
27 Dou David in Machanaïm aankommen was, kwammen Sobi, Machir en Barzillai bie hom. Sobi was n zeun van Nachas oet Rabba, hoofdstad van Ammon. Machir was n zeun van Ammiël oet Lo-Debar, en Barzillai kwam oet Rogelim in Gilead.
28 Zai haren van ales bie zok veur David en zien volk: alderhand bèrgoud, potten en pannen, waait, gaarst, meel en reusterd koorn, dikke bonen en linzen,
29 ook hunneg en botter, schoapen en vedde kaalver. "Want," zeden ze, "ie zellen vast wel muid worden wezen en honger en dörst kregen hebben in woestijn."
|
